Bananakaka

Ég játa! Þetta er eiginlega bara bananabrauð að þykjast vera kaka, en það hefur ýmsa kosti í för með sér. T.d. kippir sér enginn upp við það þegar maður lætur karamellusósu og ís á köku, en ef maður mundi gera það við brauð yrði maður litinn hornauga í samfélaginu.

Bananakaka:
125 g smjör, mjúkt
3/4 bolli púðursykur
2 egg
2-3 bananar, eftir stærð
1 dl ab-mjólk
1 1/2 tsk vanilludropar
1 1/2 bolli hveiti
1 1/2 tsk lyftiduft
1/2 tsk matarsódi

Smjörið og púðursykurinn er þeytt saman, eggjunum bætt út í einu í einu. Bananarnir eru maukaðir í matvinnsluvél og bætt út í blönduna ásamt vanillu og ab-mjólk (má líka nota sýrðan rjóma og mjólk). Hveiti, lyftiduft og matarsódi er sigtað út í og hrært þangað til kökudeig myndast 🙂 Hellið í smurt kökuform og bakið við 175°C í um 45 mínútur eða þar til kakan hefur brúnast aðeins að ofan. Berið fram með vanilluís, bananasneiðum og e.t.v. karmellusósu.

17. júní kaka

Gleðilega þjóðhátíð í gær öllsömul!

Hér á Birkigötu var haldin heljarinnar grillveisla í tilefni 70 ára afmælis íslenska lýðveldisins og meira að segja einn Dani tók þátt í fögnuðinum! Það voru grillaðir hamborgarar með heimagerðu hamborgarabrauði sem var mjög góð tilbreyting, þeir sem vilja prófa geta nálgast uppskriftina hér. Í eftirrétt var þessi þjóðlega kaka, með súkkulaðipekanhnetubotni, súkkulaðikremi og berjum og kókos ofan á.

Súkkulaðipekankaka:
100 g smjör, mjúkt
3 dl sykur
2 egg
1 1/2 dl hveiti
4 msk kakó
1 1/2 tsk vanilludropar
1/4 tsk salt
1 dl pekanhnetur, hakkaðar

Krem:
1 1/2 dl flórsykur
1/4 bolli kakó
2-3 msk mjólk/kaffi
1-2 msk smjör, mjúkt
1 tsk vanilludropar

Aðferðin er sáraeinföld, þessu er öllu einfaldlega hrært saman þar til allt er orðið að einum graut. Deigið er látið í smurt kökuform og bakað í 180°C heitum ofni í um 30 mín. Þegar kakan hefur kólnað er öllu hráefninu í kremið hrært saman og sett á kökuna. Í tilefni þjóðhátíðarinnar var gerð ein og hálf uppskrift af kökunni og bláberjum, jarðaberjahelmingum og kókos raðað á til að mynda fánann en fyrir önnur tilefni er algjör unaður að láta hindber og pekanhnetur ofan á.

Rabarbara-engifersíróp

Sæl aftur!

Þar sem ég skrapp til Íslands um miðjan maí datt bloggið smá úr takti, en hvað um það, áfram höldum vér! Á Íslandi smakkaði ég reyndar alveg unaðslegt rabarbaragos frá Himnesk Hollusta á veitingastaðnum Gló, sem er líka alveg tryllt góður. Þetta gos er reyndar ekki nýtt á markaðnum en ég var allavega nógu mikið eftirá til að smakka það fyrst núna. Allavega, það var alveg rosalega gott og þó að ég hafi fyllt hálfa ferðatöskuna af íslenskum mat þá komst rabarbaragosið ekki með. Þá brá ég á það ráð að endurskapa eitthvað þvíumlíkt. Úr varð þetta rabarbara-engifersíróp sem hægt er að nota eins og þykkni út í sódavatn til að búa til bleikan og sætan drykk.

Hráefni:
225 g rabarbari
ca. 5 cm engiferrót (um 40 g)
4 dl vatn
2 dl sykur

Rabarbarinn og engifer er skolaður og skorinn í bita, og látinn í pott með vatninu og suðan látin koma upp. Hitinn er lækkaður og blandan látin malla í um 15-20 mín. Þá er blandan sigtuð í skál eða annan pott. Ég notaði sigti og eldhúspappír, en fínt sigti ætti kannski að duga.

Þá fær maður þennan fína bleika vökva, sem má búa til sírópið úr. Vökvanum er skellt aftur í pott ef hann var ekki þar nú þegar og sykurinn látinn út í. Auðvitað má minnka eða stækka sykurmagnið eftir smekk. Sykurblandan er hituð aftur næstum að suðu eða þar til sykurinn hefur leyst upp. Þá þarf bara að láta blönduna kólna aftur og tappa á fýsileg ílát.

Til að gera rabarbaragos er sírópinu bara hellt í glas ásamt sódavatni og limesneiðum í smekklegum hlutföllum og hræra vel í. Njótið vel!

Gráðostadýfa og kjúklingavængir

Þessir kjúklingavængir og gráðostasósa eru algjört æði og ég mæli eindregið með því að þið prófið þetta. Uppskriftin er kannski dálítið tímafrek en í rauninni er þetta frekar lítið mál og frábært lúxussnakk með sjónvarpsglápi. Þetta gúmmelaði var einmitt innbyrgt yfir Eurovision-áhorfi núna á laugardaginn.

Gráðostasósa:
Gráðostur (um 100 g)
200 g sýrður rjómi
3 msk mæjónes (má sleppa)
Nýkreistur sítrónusafi, eftir smekk
Hvítlaukssalt
Pipar

Aðferð: Maukið gráðostinn með gaffli og hrærið vel saman við sýrða rjómann og mæjónesið. Svo er ca. hálf sítróna kreist yfir og saltað og piprað eftir smekk. Í staðinn fyrir hvítlaukssalt má líka kreista lítið hvítlauksrif út í og nota venjulegt salt.

Kjúklingavængir:
ca. 800 g kjúklingavængir
Hveiti ca. 2 dl
1 tsk Salt
Pipar
1 tsk laukduft
1/4 tsk cayenne pipar
1 tsk paprikuduft

Sósa:
ca. 60 g smjör
1 dl tómatsósa
1/2 dl sriracha chili sósa (ath frekar sterk sósa)
Skvetta af Worcestershire sósa
Skvetta af eplaediki (hægt að nota hvernig edik sem er)
Örlítið hunang (má sleppa)
Pipar og salt eftir smekk
Cayenne pipar (sleppa ef þið viljið ekki of sterkt)

Við gerð kjúklingavængjanna notaðist ég við þessa uppskrift frá Foodwishes sem ég mæli eindregið með að þið skoðið. Þó þurfti nokkrar breytingar til þar sem ég á ekki Frank’s Hot Sauce og veit ekki til þess að það fáist í Kaupmannahöfn. Hlutföllin í uppskriftinni eru líka frekar frjálsleg þar sem ég mældi í rauninni ekkert heldur fór bara eftir auganu. Ég þerraði bara kjúklingavængina vel, svo lét ég þá í poka með hveiti, salti, pipar, laukdufti, cayenne pipar og paprikudufti og hristi til. Vængjunum er raðað á ofnplötu með bökunarpappír eða álpappír sem hefur verið penslaður með olíu. Svo eru vængirnir eldaðir inni í 200°C heitum ofni í um hálftíma og svo snúið við og látnir eldast áfram í um 15-20 mín.

Á meðan kjúklingurinn eldast er allt í sósuna látið í pott og brætt saman (þarf ekki að sjóða). Svo er eina ráðið að smakka þetta til því að það er mismunandi hvað fólk vill hafa sósuna sterka. Ef sósan er of sterk er hægt að þynna hana út með vatni. Annars má þetta alveg rífa í því það er einmitt þetta sterka bragð sem passar svo vel með gráðostasósunni. Þegar vængirnir eru tilbúnir eru þeir settir í skál (því stærri því betri) og sósunni hellt yfir. Hristið/hrærið þar til allir vængirnir eru útataðir í sósu. Þá eru þeir settir á disk og látnir standa í nokkrar mínútur til að kólna. Einnig er hægt að láta þá aftur inn í ofninn í nokkrar mínútur til að sósan þorni aðeins utan á þeim, sem er gott þar sem eina/besta leiðin til að borða þá er með puttunum. Gott er að bera gráðostadýfuna og vængina fram með niðurskornu selleríi til að kæla munninn á milli bita. Njótið vel!

Fennelsalat

Hér er eitt sumarlegt salat með fennel og eplum og ýmsu góðgæti. Það tekur aðeins lengri tíma í undirbúningi en venjulegt salat en er alveg æðislega gott og góð tilbreyting með grillmatnum í sumar!

Hráefnin eru þessi og að sjálfsögðu ekkert heilög.

Salat:
Fennel, 1-2 eftir stærð
1 Epli
Sellerístöngull, 1/2-1
1 paprika
1/2 rauðlaukur
1/2 sítróna

Dressing:
3 msk ólífuolía
1 msk hvítvínsedik
1/2 msk hunang
salt og pipar

Svo er farið að, fennel, paprika, rauðlaukur og eplið eru skorin í örþunnar sneiðar. Nú væri gott að eiga svona mandólín til að skera þetta en ef maður er ekkert að flýta sér er frekar róandi að skera grænmetið með hníf tímunum saman. Best er að kreista sítrónuna yfir eplið þegar maður er búin að skera það í bita svo að það haldi lit. Svo er öllu í dressinguna hrært saman og hellt yfir.

Fyrir stílistana þarna úti væri hægt að skipta rauðlauknum út fyrir púrrulauk og nota grænt epli og græna papriku til að fá allt í svona fölgrænum og fallegum lit. Njótið vel. Fennel er furðugott!

Rabarbara- eplabaka

Gleðilegan 1. maí! Á þessum degi verkalýðsins er ekki úr vegi að skella í eina góða böku með rabarbara og eplum. Ég er ekki alveg viss um að baka sé rétta orðið í þessu samhengi en ég veit ekki gott orð yfir svona heita ávexti með stökku deigi yfir. En á ensku mundi þetta heita „crumble“. Kannski rabarbara -eplakrumla 🙂 Rabarbari vex allavega í mörgum görðum á Íslandi og villtur og því um að gera að nýta hann í sem flesta rétti, mikil búgdrýgindi það. Það tók mig sáran að kaupa mér rabarbara út í Brugsen en ég hef ekki séð rabarbara á víðavangi hér í Kaupmannahöfn og bý ekki svo vel að eiga garð.

Fylling:
Rabarbari, um 8-10 stönglar
Epli, 2-3
Safi úr hálfri appelsínu, má sleppa
1-2 cm engiferrót, rifin
Hrásykur, eftir auganu

Deigið:
100 gr smjör, kalt
ca. 1 dl hrásykur
ca. 1/2 dl kókoshveiti (má sleppa, og nota bara meira venjulegt hveiti)
ca. 1/2  dl hveiti
ca. 1 dl hafrar

Skolið rabarbarann vel og skerið í litla bita, skerið eplin einnig í svipaða bita. Kreistið appelsínusafann yfir, blandið saman við rifna engiferinu og stráið smá hrásykri/sykri yfir. Bræðið örlítið smjör á pönnu og mýkið rabarbara/epla blönduna yfir miðlungshita. Látið svo blönduna í botninn á eldföstu móti og útbúið deigið.

Í skál er smjör og sykri blandað saman, mér finnst best að nota hendurnar til að kreista þurrefnunum inn í smjörið. Svo er hveiti, kókoshveiti og höfrum blandað út í þangað til að deigið molnar svona í höndunum á manni án þess þó að vera of þurrt. Þá er deiginu pakkað ofan á rabarbarann og eplin og bakað inni í 180°C heitum ofni í um 35-45 mín, eða þar til deigið er orðið stökkt og gullið.

Á meðan bakan bakast er hægt að læra þýsku með því að horfa á myndbandið hér að neðan. Svo er gott að borða bökuna með þeyttum rjóma eða vanilluís.

Aspas og parmaskinka

Þegar vorar fer ferskur aspas að birtast í búðum og um að gera að borða eftir árstíðunum, þá kemst maður fljótar í sumarfílinginn. Það sakar allavega ekki að reyna. Aspas er gríðarlega fjölhæfur, hann er hægt að nota í pastarétti, með laksi, með linsoðnum eggjum og hvad som helst 🙂 . Hér er ein góð og einföld nýting á aspas sem bragðaðist mjög vel.

Innihald:
Ferskur aspas
Parma skinka
Hvítvínsedik eða balsamik
Parmesan
Salt & Pipar
Ólífuolía

Þetta er ofureinfalt, fyrst þarf bara að skola aspasinn og brjóta eða skera trénaða endann af. Ef maður tekur um neðri partinn á aspasnum og sveigir hann þá ætti hann að brotna á réttum stað. Pannan er hituð með olíunni, aspasinn látinn út á og saltaður og pipraður, þegar aspasinn er orðinn vel grænn og nærri því eldaður er gott að skvetta smá ediki út á pönnuna. Svo er parmaskinku vafið utan um nokkra í einu og parmesan rifinn yfir. Njótið vel.

Nørrebro smjör

Á Nørrebro Bryghus hér í Kaupmannahöfn er hægt að smakka á ýmsum tegundum af mjöð og mat. Við fórum þangað út að borða síðasta haust þegar bróðir minn og kærastan hans komu í heimsókn hingað og fengum þriggja rétta máltíð og bjóra með hverjum rétt, mikið splæs, mikill bjór. Allt alveg gríðarlega bragðgott og næsað. En það sem stóð upp úr var samt brauðið á borðinu og smjörið með því. Guðdómlegt smjör með hnetukeim og nýbakað súrdeigsbrauð. Þar sem elshúsið var svona hálf opið náði ég að blikka mann í eldhúsinu og veiða upp úr honum uppskriftina, sem var gífurlega einföld og svohljóðandi: Takið smjör, skiptið stykkinu í tvennt, brúnið helminginn í potti, sigtið. Blandið brúnaða smjörinu við venjulega smjörið. Semsagt smjör blandað við sjálft sig. Ég vona að myndirnar sýni þetta betur. Óhugnarlega gott á nýbakað brauð eða jafnvel til að nota í smákökuuppskriftir til að fá meira bragð.

Skiptið smjörinu í helminga

Mmm bráðið smjör

Látið smjörið krauma þangað til það verður karamellulitað og ilmandi

Sigtið í skál og látið nálgast herbergishita svo að það bræði ekki hitt smjörið sem kemur út í

Þegar brúnaða smjörið hefur kólnað má hræra því saman við sinn fyrri helming og kæla svo áfram. Þá er allt tilbúið!

Bollakökur með sítrónu og birkifræjum

Á mánudaginn fór ég örstutt matreiðslunámskeið hjá heilsu-idol-inu mínu, hinni frægu Röggu Nagla (hún er með blogg hér). Þar lærðum við að gera alls kyns hollustugúmmelaði úr framandi efnum eins og próteindufti, steviudropum og sukrin. Eftir það námskeið fór ég að sjálfsögðu í næstu heilsubúð og keypti dýrum dómum sukrin gold sem kemur nokkurn veginn í staðinn fyrir púðursykur eða hrásykur og svo splæsti ég einnig í kókoshnetuhveiti. Svo reyndi ég eftir bestu getu að gera hollar bollakökur. En góðir hlutir gerast í smáum skrefum sagði kannski einhver ekki, en ég skipti allavega sykrinum út fyrir sukrin. Ég þorði ekki að taka hveitið út því mig langaði í fluffy og sjúklega góðar bollakökur, kókoshnetuhveitið getur verið dáldið þungt. Allavega, hér eru mjög góðar og páskalegar bollakökur með sítrónubragði og birkifræjum með örlitlu hollustuívafi. Birkifræ hafa samt ekkert með birki að gera, heldur eru þetta fræ af valmúaplöntu, þetta byggir víst allt á e-rjum jiddískum misskilningi.

Bollakökur:
220 g hveiti
1 1/2 tsk lyftiduft
150 g sukrin gold eða hrásykur
2 kúfaðar msk birkifræ
Börkur af 2 sítrónum, bara guli hlutinn
1 tsk vanilludropar
2 stór egg
1 dl olía
1 dl ab mjólk
3/4 dl eplamauk

Aðferð:
Ég ákvað að leggja birkifræin í bleyti í soðnu vatni meðan ég skellti mér í sólbað, en ef það er ekki sól úti þá má alveg demba þeim bara beint út í 🙂 . Hveiti, sykri, lyftidufti, birkifræjum og sítrónubörk er blandað saman í skál. Öllu hinu hrært saman í annari skál og svo er því blandað saman við þurrefnin, passið bara að hræra ekki of mikið. Svo einfalt er það. Svo er deiginu skipt niður í muffinsformin, þið ættuð að fá um 16 kökur úr þessari uppskrift. Bakað við 180°C í um 15-20 mín eða þar til að prjónn kemur hreinn upp úr kökunum.

Ég ákvað að sleppa hollustunni í kreminu og gerði bara rjómaostakremið góða en þó með aðeins meiri sítrónusafa en áður og aðeins minna af flórsykri (það er líka til sukrin flórsykur). Kremið varð því aðeins meira fljótandi, og svo stráði ég meiri sítrónubörk ofan á. En það má algjörlega sleppa kremi, eða finna e-ð hollara ofan á.

Gleðilega páska!

Karjalanpiirakka

Finnland er kannski er kannski ekki þekkt fyrir matargerð sína en þar leynast þó nokkrir frábærir réttir. Ég bjó í Naantali, í Finnlandi haustið 2007 með systur minni sem var þar í námi og fékk þá að kynnast því hvað Finnland er AWESOME land! Árið 2009 fékk ég svo sumarvinnu í Tampere og fékk að endurnýja kynnin í betra veðri.  Það sem mér finnst einna best í matardeildinni frá Finnlandi (á eftir Missä X!!) eru pirökkur sem eru einhvers konar einhvers konar sætabrauð sem er þó ekki sætt á bragðið. Þær samanstanda af þunnu rúgdeigi og einhverns konar fyllingu. Fyllingin getur verið margs konar, oftast er það grjónagrautur eða grjónagrautur + rifnar gulrætur eða jafnvel kartöflumús.

Grjónagrautur:
2 1/4 dl Grautargrjón
2 1/2 dl vatn
1 l mjólk
Salt

Deig:
3 dl gróft rúgmjöl
2 dl heilhveiti
1 tsk salt
2-2 1/2 dl Vatn

Fyrst er grjónagrauturinn gerður eftir kúnstarinnar reglum, ég byrja reyndar á því að bræða smá smjör í potti og steikja grjónin aðeins í þeim, svo helli ég vatninu út á og læt sjóða þar til vatnið er næstum horfið. Þá lætur maður mjólkina út í, kannski fyrst helminginn og svo bæta alltaf meira í, eða ef maður er óþolinmóður er hægt að demba fernunni út í allri í einu. Svo er grauturinn látinn malla á lágum hita þangað til mjólkin verður svona glansandi og grjónin tilbúin, og þá er hann saltaður. Fyrir þennan tilgang er best að hafa grautinn mjög þykkann, og engar rúsínur takk!

Meðan grautinn er að kólna er rúgmjölinu, heilhveitinu og saltinu blandað saman og hnoðað með vatni. Látið eins mikið vatn og deigið getur tekið við, það þarf að verða hnoðanlegt en má samt alveg vera vel klístrað. Klípið smá af deiginu og hnoðið kúlu sem er á rétt minni en golfkúla, eftir því hvað þið viljið stórar/litlar pirökkur. Stráið vel af hveiti á kúluna og fletjið aðeins út í höndunum. Svo þarf að strá meira af hveiti á borðið og fletja út deigið með kökukefli í spöröskjulaga köku á stærð við hendi. Skv. Finnum á deigið að vera það þunnt að maður sjái sólskinið í gegn, en það má heldur ekki rifna því það þarf að halda á grjónagrautnum. Allavega, svo er grjónagrautur settur inn í og kanturinn klipinn upp á grautinn eins og vonandi sést á myndinni. Ég tók hluta af grjónagrautnum frá og blandaði við rifnar gulrætur.

Þessi uppskrift ætti að gefa um 20 kökur, eftir því hvað deigið er þunnt og kökurnar stórar. Allt er þetta bakað inn í heitum ofni, um 270°C í um 10-15 mín eða þar til kantarnir eru orðnir létt brúnaðir og grautinn með svona þurrt yfirborð. Um leið og kökurnar koma út úr ofninum er gott að dýfa þeim í smjör og mjólkurblöndu (bráðið smjör og mjólk blandað saman). Svo eru kökurnar látnar kólna undir hreinu viskustykki til að þær haldist mjúkar.

Hefðbunda leiðin er að bera þessar fram volgar með eggjasmjöri. Þá eru harðsoðin egg skorin niður og þeim hrært út í mjúkt smjör. Það hljómar undarlega en það er samt furðu gott. Hlutföllin eru kannski bara smekksatriði en ég mér finnst um 50 – 60 g af smjöri vega ágætlega á móti tveimur harðsoðnum eggjum. Annars er líka gott að borða þær bara eintómar, eða með e-rju áleggi. Þær eru líka mjög hentugar í nesti þar sem maður getur auðveldlega fryst þær og hitað bara upp í örbylgjuofni, eða ofan á brauðristinni fyrir þá sem eiga ekki svona nýbylgjuofna. Eins og sést á myndinni þá skapar æfingin vonandi meistarann í útlitsgerð pirakka, en þær eru allavega bragðgóðar, og svo krúttlegar, þær minna mann á sauðskinnskó. Allavega vona ég að þið prófið þetta, þetta er ekki alveg jafn mikið vesen og maður heldur og algjörlega þess virði. Njótið vel!