Portobello borgari

Eftir stóra grillveislu hjá okkur í síðustu viku dúkkaði eitt og annað nýtt uppi í ískápnum. Einhver hafði skilið eftir stærðarinnar portobello svepp og hamborgarabrauð. Búm! Allt til í kvöldmat. Þetta er nú eiginlega engin uppskrift en hér eru innihaldsefnin sem ég notaði.

Portobello sveppur
Laukur
Mexíkóostur
Steinselja
Hamborgarabrauð
Grænmeti

IMG_3597

Stöngullinn er skorinn af sveppnum og saxaður niður ásamt lauk og steinselju og smá mexíkóosti öllu hrært saman og pakkað aftur inn í sveppinn. Drissað með ólífuolíu og látið inn í 200°C heitan ofn þar í um 20 mín eða þar til sveppurinn er tilbúinn. Hamborgarabrauðið einning drissað með olíu og látið ristast inni í ofninum. Svo er það nuddað með hvítlauk og þeim sósum og grænmeti sem manni lystir bætt við. Borðað.IMG_3606

Auglýsingar

Crème brûlée

Mikill persónulegur sigur vannst í eldhúsinu í dag þar sem mér tókst að búa til sómasamlegt Crème brûlée. Nokkrar misheppnaðar tilraunir hafa verið gerðar hingað til og þetta var farið að leggjast alvarlega á sálina hjá mér. Um jólin fékk ég bókina Søde Sager eftir Mette Blomsterberg, sem er kontitori sjéní, ásamt handhægum gasbrennara og skálum þannig að öll tæki voru til staðar. En allavega nú er kominn júní og þetta heppnaðist loksins! Ekki vera hrædd, þetta var bara önnur tilraun ársins. Hér er uppskriftin og aðferðin, þetta er víst ekki svo flókið 😉

Fyrir fjóra til fimm:
100 g hrásykur
1,3 dl af eggjarauðum
6,5 dl af rjóma
1 vanillustöng
hrásykur til að strá yfir

IMG_3559100 g hrásykur og eggjarauður eru hrærðar saman með handþeytara. Vanillustöngin klofin og kornin skröpuð út og látin í pott ásamt rjómanum. Rjóminn er hitaður að suðu og látin malla í örfáar mínútur. Takið af hitanum, hellið smátt og smátt saman við eggjahræruna og hrærið stöðugt í á meðan. Hrærið aðeins áfram þegar allur rjóminn er kominn út í. Fleytið svo mestu froðuna ofan af og hellið í skálar. Ég var með frekar lágar og breiðar skálar frá Emile Henry og blandan hefði komist í 5 þannig (á bara fjórar). Til að búðingurinn bakist jafnt er hægt að setja skálarnar í ofnskúffu og hella soðnu vatni í þannig að fljóti um skálarnar. Setjið inn í 150°C heitan ofn og bakið í ca. 30 mínútur eða þar til búðingurinn hefur stirnað. Kælið svo í minnst 4 tíma eða til næsta dags. Stráið svo þunnu lagi af hrásykri yfir og brennið með gasbrennara eða á grillstillingu í ofni. Ef gasbrennari er notaður er gott að halla skálinni og snúa meðan sykurinn er hitaður. Kælið létt og berið svo fram með rjúkandi kaffibolla.

IMG_3563