Jæja loksins er vorið komið til Kaupmannahafnar ætla ég að halda fram, þ.e. þrátt fyrir smá slyddu í gær. En ég er allavega komin í vorfílinginn 
Af því tilefni fór ég í smá verslunarleiðangur og keypti kryddjurtir fyrir sumarið. Rósmarín, timjan, salvía og kóríander. Þar sem basilplantan mín hafði gefið upp öndina var komin tími á endurnýjun. Nú er bara að vona að þessar lifi lengur 
.
Þessi súpa er alveg mjög einföld (eins og flestar súpur) en alveg rosalega bragðgóð. Það er eitthver náttúrulegur hnetukeimur af jarðskokkunum sem láta súpuna bragðast eins og hún hafi verið gerð á fínasta veitingahúsi. Jarðskokkar eru auðfundnir í búðum hér í Danmörku á veturnar og ég er nokkuð viss um að þeir fáist líka á Íslandi. Jarðskokkar (e. Jerusalem Artichokes) geta verið dáldið erfiðir fyrir meltinguna en þegar búið er að gera ilmandi góða súpu úr þeim er ekki hægt að standast freistinguna.
Jarðskokkasúpa (fyrir 3-4):
750 g jarðskokkar
1 laukur
smjör
1-2 tsk kóríander
timjan
salt og pipar
1-2 dl rjómi
kjúklingakraftur/soð
1 epli
pekanhnetur (má sleppa)
Jarðskokkarnir eru skrældir og skornir í bita og laukurinn saxaður. Takið fram súpupott og látið á helluna með smá smjöri. Mýkið laukinn í smjörinu og þegar hann er orðinn glær látiði jarðskokka og kryddið út í. Hellið kjúklingasoði yfir þar til flýtur yfir grænmetið. Látið sjóða þar til jarðskokkarnir eru mjúkir. Maukið með töfrasprota og setjið rjóma út í og smakkið súpuna til. Berið fram með niðurskornum eplum og pekanhnetum eða vorlauk.
p.s. afsakið slæma mynd, ég týndi betri myndinni 
.
Ég fékk bókina Søde Sager eftir Mette Blomsterberg í jólagjöf og átti alltaf eftir að baka eitthvað úr þeirri bók. Mette er afburða konditormeistari og rekur kaffihús í Glyptoteket. Eftir miklar vangaveltur og kökulanganir ákvað ég að prófa þessar valhnetubollakökur. Mér leist ekki á kremið sem var í bókinni og vöntunina á súkkulaði þannig að ég lagaði uppskriftina aðeins til. En úr var afbragðs kvöldhressing sem bragðaðist unaðslega með ískaldri mjólk. Njótið vel .
Bollakökur:
1 vanillustöng
150 g hrásykur
250 g hveiti
3 tsk lyftiduft
1/2 tsk salt
2 egg
100 g bragðlítil olía
2,5 dl mjólk
50 g grófhakkaðar valhnetur
1 mars skorið í litla bita
Aðferð:
Vanillustöngin skorin í tvennt og fræhreinsuð. Takið smá af sykrinum og blandið saman við vanillufræin. Blandið hveiti, sykri, lyftidufti og salti saman í skál og hrærið létt. Hrærið út í eggjunum og olíunni og því næst mjólkinni í smáum skömmtum. Bætið að lokum hnetunum og marsinu út í. Athugið að gott er að velta marsbitunum upp úr örlitlu hveiti svo að þeir festist ekki saman. Skiptið deiginu jafnt í muffinsform og bakið í 175°C heitum ofni í u.þ.b. 16 mín. Úr deiginu ættu að koma 10-12 kökur.
Kremið ofan á var fengið að láni frá mömmur.is en ég gerði bara 1/3 af þeirri uppskrift. Einnig lét ég smá mjólk út í súkkulaðið og marsið meðan það var að bráðna.
Þessi kjúklingaréttur varð til hér á Birkegade eitt mjög svangt kvöld. Þessi blanda heppnaðist svo vel að mig langaði að deila þessu með ykkur. Verði ykkur að góðu .
Kjúklingaréttur fyrir 4:
4 kjúklingabringur
1 fennel
1 sítróna
6 döðlur
nokkur rif hvítlaukur
1 sellerístöngull
furuhnetur (ef vill)
olía
rósmarín
múskat
salt og pipar
Takið fram eldfast mót og látið smá olíu í botninn. Skerið fennel í sneiðar og leggið í mótið ásamt niðurskornu selleríi, döðlum og hvítlauk. Látið bringurnar yfir og kryddið með salti, pipar og rósmaríni og örlitlu múskati. Ef það eru til furuhnetur í húsinu er gott að fleygja nokkrum með. Kreistið sítrónuna yfir allt og látið fylgja með inn i ofn. Látið í 180°C heitan ofn í u.þ.b. 45 mín. Gott er að bera kjúklinginn fram með veglegu salati og búlgúr eða hýðishrísgrjónum.
Mér hefur lengi langað til að gera köku með chai-te bragði. Þegar ég sá þessa uppskrift ákvað ég að prófa að gera e-ð svipað með chai te og með dyggum stuðningi frá Völu varð til þessi prýðiskaka .
Innihald:
50 g púðursykur
175 g sykur
100 g smjör, mjúkt
2 egg
1 bolli mjólk
3 tepokar, chai
1 tsk vanilludropar
1 tsk lyftiduft
1/2 tsk salt
1 1/2 bolli hveiti
Aðferð
Mjólkin er hituð að suðu (passa að brenna ekki) og tepokarnir látnir út í. Slökkvið undir og leyfið að kólna.
Smjörið og sykurinn er þeytt saman og svo eggjunum hrært út í einu í einu. Því næst er þurrefnunum blandað út í og hrært, að lokum er temjólkinni (auðvitað án tepokanna) bætt út í og hrært. Hellið í smurt form og bakið við u.þ.b. 180°C í 40 mín eða þar til hægt er að stinga prjón í kökuna og hann kemur þurr út.
Ofan á kökuna lét ég minnkaða uppskrift af rjómaostakreminu og fræ úr granatepli. Það væri líka mjög gott að láta banana eða pekanhnetur ofan á. Njótið vel og slakið á með chai te og thai chi.
Namaste!!!
Ég veit um fátt betra en indverskan mat. Þennan rétt lærði ég af vinkonu minni þegar ég var á Indlandi. Hún borðar reyndar ekki kjöt svo hún notaði Paneer sem er einhverskonar ostur ekki ósvipaður og tofu. Ég hef hinsvegar notað kjúkling upp á síðkastið þar sem viðbrögðin við tofu-inu hafa verið misgóð:P
Cashew butter chicken
1. Leggið cashew hneturnar í bleyti, 2. Léttsteikja hvítlauk og lauk upp úr smjöri (hún setti slatta af smjöri en ég reyni vanalega að takmarka það), 3. Skera kjúklingabringur í bita og steikja á annarri pönnu, 4. Setja cashew hneturnar í blender með smá vatni og mauka, 4. Cashew þykkninu er svo hellt á pönnuna með lauknum ásamt tómatsósunni, 5. kryddin sett út í (ég mæli kryddin vanalega ekki, heldur smakka bara til), 6. rétturinn látinn malla og ferskum kóríander svo stráð yfir áður en hann er borin fram. Ef rétturinn er of þykkur má bæta smá vatni við til að þynna.
(Ég bæti líka stundum við engiferi, limesafa ofl.)
Naan brauð
Uppskriftin af naan brauðinu er reyndar stolin af eldhus.is en ég er búin að helminga uppskriftina þar sem mér finnst hún of stór.
Geri, sykri og volgri mjólk blandað saman og látið standa í 15 min. Síðan er hveiti, lyftidufti, jógúrti, olíu og salti blandað saman við. Deigið hnoðað og hveiti bætt við þangað til það er ekki of blautt. Látið hefast í 1 klst. Ég skipti síðan deiginu upp í litlar kúlur sem ég hnoða og velti upp úr kryddblöndu og salti (sem ég hef á disk til hliðar). Síðan flet ég brauðið út og smyr með bræddu smjöri með hvítlauk og steiki á pönnu. Best væri að hafa pönnukökupönnu en þar sem ég á ekki svoleiðis steiki ég brauðið á venjulegri pönnu (hef líka prófað að grilla brauðið sem er rosalega gott:) Að lokum skelli ég smá meiru af hvítlaukssmjöri á brauðin og strái ferskum kóríander yfir. Namminamm
Raita
Agúrka skorin niður í litla bita (ég sker vanalega græna af, en það er smekksatriði) og blandað saman við jógúrt, cumin, hvítlauk og myntu (sumir setja smá cayenne pipar líka)
Borið fram með papadums sem keyptar eru tilbúnar úti í búð og þarf rétt að djúpsteikja upp úr olíu…og svo að sjálfsögðu hrísgrjón:)
Verði ykkur að góðu!
Þessar múffur eru mjög góðar í hollustupartý, nestisboxið eða bara nokkrar saman með góðu salati sem hollur hádegismatur. Quinoa er líka svo töff, hljómar eins og eitthvað sem Pocahontas hefur borðað mikið af .
Múffur:
1 bolli quinoa
2 bollar vatn
1 lítill laukur
1 gulrót
5 cm bútur af sellerí
3-4 sveppir
smá bútur af papriku
2-3 egg
1 tsk oregano
1 tsk basil
salt og pipar
ofan á:
Pitsasósa
Mozzarella
Aðferð:
Quinoa og vatn sett í pott og hitað undir loki, þegar suðan kemur upp er hitinn lækkaður og látið malla undir loki þar til vatnið er gufað upp (u.þ.b. 15 mín). Allt grænmetið er skorið mjög smátt og mýkt aðeins á pönnunni sem Þóra besta systir gaf ykkur í jólagjöf . Grænmetinu og quinoa blandað saman og kryddað eftir smekk, látið kólna aðeins áður en eggjunum er hrært út í. Látið í muffinsform, gerið litla holu í miðjuna á hverri múffu og mokið sósu og osti yfir. Bakið við 200°C þar til osturinn er orðinn gullinn.
